Skip to main content

काय बदललं? फक्त कॅलेंडर?


A click by: Sushil Ladkat


काय बदललं? फक्त कॅलेंडर!


रोजचा सूर्य तसाच उगवला आहे.

सुर्यास्तसुद्धा तसाच,

सकाळ तशीच आहे.

काय बदललं? फक्त कॅलेंडर!


गरमागरम चहानेच दिवसाची सुरूवात होत होती,

आजही तशीच होते आहे.

काहींचा आळसाने दिवस सुरू व्हायचा,

काहींचा उत्साहाने.

आजही तेच घडतंय.

मग काय बदललं? केवळ कॅलेंडर!


वर्तमानपत्रात काल बातम्याच आल्या होत्या,

आजही बातम्याच आल्या आहेत.

केवळ वर्तमानपत्रावरील तारीख बदलली, वर्ष बदललं.

काल ३१ तारीख होती, आज १.

दर महिन्यात असतं हे,

मग बदललं काय? फक्त कॅलेंडर!


आजूबाजूला असणारी माणसं तीच आहेत,

रोजची कामं तीच असणार आहेत.

काय बदललं? फक्त कॅलेंडर!


दिवस २४ तासांचाच राहिलाय,

कामाची वेळही तीच राहिलीय.

काय बदललं? फक्त कॅलेंडर!

.

.

कष्ट तितकेच आहेत,

त्यात काही बदल नाही.

रोजची काम तीच आहेत,

रुटीन तसंच आहे.

बदललं काय, केवळ कॅलेंडर!

.

.

सगळं खरंय, पण माणसाला काही ना काही बदल घडलाय किंवा घडेल (चांगला) हे वाटण्याची संधी आहे हे बदलणारं कॅलेंडर!

सूर्य तोच असला तरी उत्साह नवा आहे असं सांगतं हे कॅलेंडर!


कॅलेंडर फक्त बदलत नाही, जुनं जे नको आहे ते विसरुन पुढे जायला शिकवतं.


जे चांगलं घडून गेलं आहे त्याची आठवण आणि जाण ठेवायला लावतं.


माणसं,

ऑफिस,

व्यवसाय,

उद्योग,

उपक्रम,

काम

असं सगळं तेच आहे हे मान्य, पण नवं कॅलेंडर या सगळ्याकडे नव्या दृष्टिकोनातून पाहायला लावेल कदाचित!


हे कॅलेंडर नवी दिशा आणि नवा उत्साह देईल अशी आशा बाळगणारे आपण सामान्य जन. ही आशाच आपल्यातलं बळ टिकवते आणि वाढवते.


कॅलेंडर बदललं, बदलतं. हे होतच राहील.


पण अनेक गोष्टी शिकवतं आणि सुचवतं हे बदलणारं कॅलेंडर. ते कॅलेंडर सुचवत असलेल्या गोष्टी घ्यायच्या की नाही हे आपण ठरवायचं.

.

.

एका वर्षातून दुसऱ्या वर्षात आपण यशस्वीपणे पोहोचलो याची जाणीव करून देतं हे बदललेलं कॅलेंडर.


कधी वाटतं की कुठे काय ग्रेट केलं आपण सरत्या वर्षात? मग मनाला पटवतं हे नवं कॅलेंडर की अरे, तू मागच्या वर्षात सर्वाईव्ह झाला हे ही एक प्रकारचं यशच आहे.


नव्या वर्षाचं नवं स्वरूप बघायला लावतं हे बदललेलं कॅलेंडर.


नवे प्लॅन्स, संकल्प करायला प्रवृत्त करतं हे बदलणारं कॅलेंडर. (अमलात नाही आले तरी किमान डोक्याला चालना तरी द्यायला लावतं.)


नव्याने नवा विचार डोक्यात आणतं हे बदलू पाहणारं कॅलेंडर.

आपल्याला वाटतं आपणही कदाचित बदलू या कॅलेंडरसह, चांगल्या अर्थाने, ठरवलं तर!

.

.

कॅलेंडर बदलतं, एकदम बदलत नाही. त्यासाठी ३६५ दिवस लागतात. तेव्हा कुठे एकाने त्याची प्रगती होते. म्हणजेच तेव्हा कुठे २०२१ साल बदलून २०२२ होतं. हा दिसताना एवढासा बदल खरोखरी अमलात यायला कितीतरी वेळ जावा लागतो. म्हणूनच हे कॅलेंडर संयम शिकवून जातं. हे कॅलेंडर पुढे जाण्याचं बळ देऊन जातं.


हो, बदललं कॅलेंडर, पण फक्त बदललं नाही, पुढे गेलं आणि शिकवून गेलं की मी ही पुढे जाऊ शकतो, कणाकणाने!


- वरुण भागवत


Comments

Post a Comment

Popular posts from this blog

Parking आणि त्या तिघी!

  ईशा किराणामालाच्या दुकानातून दोन जड पिशव्या तिच्या नाजूक हातात घेऊन आपल्या two wheeler पाशी पोहोचली. तिथे गेल्या गेल्या तिला दिसलं की तिच्या गाडीच्या दोन्ही बाजूंना चिकटून दोन गाड्या लावल्या आहेत. आणि या तीनही गाड्या side stand वर आहेत. बाकीच्यांनी गाड्या side stand वर लावण्याचं कारण म्हणजे mostly आळस किंवा parking मध्ये दुसऱ्याची गाडी काढायला लावायला अवघड जाईल यांचं भान नसणे. ईशाने side stand वर लावण्याचं कारण आळस नव्हतं, तिला भान होतं; पण तिच्या नाजूक बांध्याला गाडी double stand वर लावणं म्हणजे कमरेची वाट लावून घेण्यासारखं होतं. त्यामुळे ती गाडी side stand वर लावायची. त्यामुळे गाडी काढताना अडचण होणं हा आजचा problem नव्हता. पण नेहमी कोणी ना कोणी सहाय्यास येई. आज मात्र गाडी main road पासून आत साधारण ५०० मीटर अंतरावर असणाऱ्या गल्लीत, उजवीकडे वळून अजून पुढे १०० मीटरवर असणाऱ्या किराणा दुकानासमोर होती. दुपारचा १ वाजला होता. Grocery shop मध्ये सकाळच्या सत्रातली ईशाच शेवटची customer होती. तिने सामान भरताच Shutter down करून ईशा गाडीजवळ येईपर्यंत भरत भाई निघून गेला. गल्ली, दुपारी १ ची व...

कर्माचं Circle

A Click by- Sushil Ladkat एक होता उंदीर आणि एक होता बेडूक. यांची झाली मैत्री. थोडं odd होतं हे combination. उंदीर बिचारा भोळा आणि बेडूक थोडा लबाड. हा बेडूक उंदराशी वाट्टेल तसं विचित्र वागायचा आणि त्याचं त्या बेडकाला कधीच काही वाटायचं नाही. त्याला तो कायम कमी लेखायचा. उंदीर त्याचं काहीच वाकडं करू शकणार नाही याची त्याला खात्री होती आणि हे बऱ्यापैकी खरं सुद्धा होतं. उंदीर कधीच काही बोलायचा नाही. असली मैत्री तरी का असावी असा एक प्रश्न कोणालाही पडला असता. पण ज्याला पडायला पाहिजे त्या उंदराला तो पडत नव्हता. पर्याय नसल्यासारखं , जगातले इतर मित्र संपल्यासारखा तो घाबरून का होईना त्याच्यासोबत राहत होता. त्यामुळे बेडकाचं असं बेदरकार वागणं वाढू लागलं. एक दिवस तर बेडकाने कहर केला. त्याला उंदराची अतीशय नीच दर्जाची मस्करी करायची लहर आली. त्याने उंदराचा पाय स्वतःच्या पायाला बांधला आणि उड्या मारत फेरफटका मारायला निघाला. उंदीर फरफटत त्याच्या सोबत ओढला जाऊ लागला. डबकं तर बेडकाची अतीशय लाडकी जागा. त्याने उंदराचा आणि बाकी कसलाच पुढचा मागचा विचार न करता डबक्यात उडी टाकली. स्वतः मस्तपैकी पाण्यात खेळू ल...

Confidence आणि Overconfidence

A click by - Varun Bhagwat एक होता राजा त्याची खुशीत होती प्रजा! दरबारी आला मूर्तीकार, म्हटला माझ्यासारखे दिसणारे पुतळे बनवेन मी हजार! सगळ्यांना ऐकूनच वाटला हा चमत्कार, गर्वाने फुलून मूर्तीकार म्हणाला , " अशक्य आहे माझी हार!" हे सगळं नाटक संपल्यानंतर राजा म्हणाला , " इतका विश्वास आहे स्वतःवर ?" मूर्तीकार हसत म्हणाला, " मी माझ्यासारखे दिसणारे ९९९ पुतळे बनवेन आणि त्या पुतळ्यांमध्ये मी स्वतः जाऊन उभा राहीन. तुम्हाला त्या सर्वांमधून मला शोधून काढावं लागेल.” “मान्य!” राजा म्हणाला. मूर्तीकाराने अगदी हुबेहूब पुतळे बनवले. त्या सर्व पुतळ्यांना सारखी वेशभूषा आणि एक उभी राहण्याची विशिष्ट पद्धत देऊ केली. तशाच पद्धतीत आणि वेशभूषेत तो त्यांच्यात मिसळून उभा राहिला. राजाला बोलावलं गेलं. राजाने सगळ्या पुतळ्यांचं वेशभूषेसकट निरीक्षण केलं. राजाला त्याच्या skills चं आणि कलेचं कौतुक वाटलं, मात्र राजाला त्याची बोलण्याची पद्धत पटली नव्हती. मूर्तीकाराला त्याच्या skills चा अभिमान असता तर ठीक पण त्याला तर गर्व झाला होता. अभिमान असणं आणि स्वत:च्या कलेबाबत confident असणं उत्तम. पण o...