Skip to main content

चमत्कार

A Click By: Varun Bhagwat


"कधी ऐकलंय का की सशाने सिंहाची शिकार केलीये?

गाय बिनधास्तपणे वाघाच्या समोरून चाललीये?" शिक्षक मुलांशी बोलत होते. हे ऐकून मुलं हसू लागली. "असं कसं होईल सर?" एक मुलगा सरांना म्हणाला, "आम्ही नाही ऐकलं असं काही!"

"नाही ऐकलं ना... कारण अशी गोष्ट एखादा चमत्कार झाला तरच शक्य आहे." शिक्षक मुलांना सांगत होते, "मुलांनो, चमत्कार करणं कोणाच्या हातात आहे?"

"आपल्या तर हातात नाही बुवा." अलका म्हणाली.

"खरंच?" सरांनी प्रश्न केला.

"कसं शक्य आहे सर आपल्याला?? आपल्याकडे काय जादू आहे की काय?" बाकी मुलांनी पण अलकाच्या बोलण्याला दुजोरा दिला.


सर हसले आणि म्हणाले, "हो आपल्याकडे जादूच आहे. मनात आणलं तर ती जादू वापरून काहीही करणं शक्य आहे. पण त्यासाठी आपला आपल्यावर विश्वास हवा."

मुलं प्रश्नार्थक नजरेने सरांकडे पाहत होती.


सर सांगू लागले, "एकदा एका छोट्या पक्ष्याने समुद्रकिनारी अंडी दिली. काही वेळातच भरती आली आणि समुद्राने त्या पक्ष्याची अंडी स्वतःच्या पोटात घातली. पक्ष्याला फार वाईट वाटलं. आधी त्याने समुद्राला विनंती केली की अंडी परत कर म्हणून. पण समुद्राला आपल्या शक्तीचा गर्व झाला. त्याने विनंती फेटाळून लावली. पक्ष्याने समुद्राला सांगितलं की तू जर माझी अंडी दिली नाहीस तर मी तुला पूर्ण कोरडा करेन."

हे ऐकून वैभव हसला आणि म्हणाला, "कसं शक्य आहे?"


सर म्हणाले, "अजून गोष्ट संपलेली नाही. समुद्र सुद्धा त्या पक्ष्याचं बोलणं ऐकून तुमच्यासारखाच हसला. पण पक्ष्याने निश्चय केला. त्याला त्याची अंडी हवी होती. तो समुद्रातला एक एक थेंब चोचीने उचलून बाहेर टाकू लागला. पक्ष्याचा साथीदारसुद्धा त्याची सोबत करू लागला. ही बातमी हळूहळू समस्त पक्ष्यांपर्यंत पोचली. पक्ष्यांचा राजा गरुड याने फर्मान काढलं की आपण त्याची मदत करूया. त्या बिचाऱ्या पक्ष्यावर अन्याय होतोय. सर्व पक्षी समुद्रकिनारी जमले आणि चोचीतून पाणी घेऊन दूर टाकू लागले. समुद्रातले मासे हा उपक्रम पाहून घाबरले. खरंच पक्ष्यांनी समुद्र कोरडा केला तर आपली खैर नाही. त्यांनी समुद्राकडे याचना केली. समुद्राला सुध्दा मग माघार घ्यावी लागली आणि अंडी परत करावी लागली."


अलका पटकन म्हणून गेली, "सर, चमत्कार!"

सर हसले.


वैभव म्हणाला, "सर, पण ससा कशी करेल सिंहाची शिकार?"

सर वैभवला म्हणाले, "इथे ससा म्हणजे कमकुवत व्यक्ती, अर्थात अशी व्यक्ती जी स्वतःला कमकुवत समजते. सिंह म्हणजे बलशाली व्यक्ती. हे प्रतिकात्मक आहे वैभव. असा विचार कर की  दृढनिश्चय आणि एकी असेल तर काहीही शक्य आहे. मग कोणीही कोणालाही हरवू शकतं.

कोणाला कमी लेखायचं नाही. स्वतःला तर मुळीच नाही. मग नक्की घडतात चमत्कार!


- वरुण भागवत


Comments

Post a Comment

Popular posts from this blog

Parking आणि त्या तिघी!

  ईशा किराणामालाच्या दुकानातून दोन जड पिशव्या तिच्या नाजूक हातात घेऊन आपल्या two wheeler पाशी पोहोचली. तिथे गेल्या गेल्या तिला दिसलं की तिच्या गाडीच्या दोन्ही बाजूंना चिकटून दोन गाड्या लावल्या आहेत. आणि या तीनही गाड्या side stand वर आहेत. बाकीच्यांनी गाड्या side stand वर लावण्याचं कारण म्हणजे mostly आळस किंवा parking मध्ये दुसऱ्याची गाडी काढायला लावायला अवघड जाईल यांचं भान नसणे. ईशाने side stand वर लावण्याचं कारण आळस नव्हतं, तिला भान होतं; पण तिच्या नाजूक बांध्याला गाडी double stand वर लावणं म्हणजे कमरेची वाट लावून घेण्यासारखं होतं. त्यामुळे ती गाडी side stand वर लावायची. त्यामुळे गाडी काढताना अडचण होणं हा आजचा problem नव्हता. पण नेहमी कोणी ना कोणी सहाय्यास येई. आज मात्र गाडी main road पासून आत साधारण ५०० मीटर अंतरावर असणाऱ्या गल्लीत, उजवीकडे वळून अजून पुढे १०० मीटरवर असणाऱ्या किराणा दुकानासमोर होती. दुपारचा १ वाजला होता. Grocery shop मध्ये सकाळच्या सत्रातली ईशाच शेवटची customer होती. तिने सामान भरताच Shutter down करून ईशा गाडीजवळ येईपर्यंत भरत भाई निघून गेला. गल्ली, दुपारी १ ची व...

कर्माचं Circle

A Click by- Sushil Ladkat एक होता उंदीर आणि एक होता बेडूक. यांची झाली मैत्री. थोडं odd होतं हे combination. उंदीर बिचारा भोळा आणि बेडूक थोडा लबाड. हा बेडूक उंदराशी वाट्टेल तसं विचित्र वागायचा आणि त्याचं त्या बेडकाला कधीच काही वाटायचं नाही. त्याला तो कायम कमी लेखायचा. उंदीर त्याचं काहीच वाकडं करू शकणार नाही याची त्याला खात्री होती आणि हे बऱ्यापैकी खरं सुद्धा होतं. उंदीर कधीच काही बोलायचा नाही. असली मैत्री तरी का असावी असा एक प्रश्न कोणालाही पडला असता. पण ज्याला पडायला पाहिजे त्या उंदराला तो पडत नव्हता. पर्याय नसल्यासारखं , जगातले इतर मित्र संपल्यासारखा तो घाबरून का होईना त्याच्यासोबत राहत होता. त्यामुळे बेडकाचं असं बेदरकार वागणं वाढू लागलं. एक दिवस तर बेडकाने कहर केला. त्याला उंदराची अतीशय नीच दर्जाची मस्करी करायची लहर आली. त्याने उंदराचा पाय स्वतःच्या पायाला बांधला आणि उड्या मारत फेरफटका मारायला निघाला. उंदीर फरफटत त्याच्या सोबत ओढला जाऊ लागला. डबकं तर बेडकाची अतीशय लाडकी जागा. त्याने उंदराचा आणि बाकी कसलाच पुढचा मागचा विचार न करता डबक्यात उडी टाकली. स्वतः मस्तपैकी पाण्यात खेळू ल...

Confidence आणि Overconfidence

A click by - Varun Bhagwat एक होता राजा त्याची खुशीत होती प्रजा! दरबारी आला मूर्तीकार, म्हटला माझ्यासारखे दिसणारे पुतळे बनवेन मी हजार! सगळ्यांना ऐकूनच वाटला हा चमत्कार, गर्वाने फुलून मूर्तीकार म्हणाला , " अशक्य आहे माझी हार!" हे सगळं नाटक संपल्यानंतर राजा म्हणाला , " इतका विश्वास आहे स्वतःवर ?" मूर्तीकार हसत म्हणाला, " मी माझ्यासारखे दिसणारे ९९९ पुतळे बनवेन आणि त्या पुतळ्यांमध्ये मी स्वतः जाऊन उभा राहीन. तुम्हाला त्या सर्वांमधून मला शोधून काढावं लागेल.” “मान्य!” राजा म्हणाला. मूर्तीकाराने अगदी हुबेहूब पुतळे बनवले. त्या सर्व पुतळ्यांना सारखी वेशभूषा आणि एक उभी राहण्याची विशिष्ट पद्धत देऊ केली. तशाच पद्धतीत आणि वेशभूषेत तो त्यांच्यात मिसळून उभा राहिला. राजाला बोलावलं गेलं. राजाने सगळ्या पुतळ्यांचं वेशभूषेसकट निरीक्षण केलं. राजाला त्याच्या skills चं आणि कलेचं कौतुक वाटलं, मात्र राजाला त्याची बोलण्याची पद्धत पटली नव्हती. मूर्तीकाराला त्याच्या skills चा अभिमान असता तर ठीक पण त्याला तर गर्व झाला होता. अभिमान असणं आणि स्वत:च्या कलेबाबत confident असणं उत्तम. पण o...